سوئٹزرلینڈ کے کینٹون والیس کے شکاریوں نے منگل کو گومس کے علاقے میں ایک بھیڑیے کو مار ڈالا۔ کینٹون انتظامیہ نے اس کے لیے پہلے ہی شکار کی اجازت جاری کر رکھی تھی۔ البین پہاڑوں پر چراگاہ کے شروع ہونے کے بعد سے بھیڑیوں نے بھیڑوں کے ریوڑ پر بار بار حملے کیے ہیں۔ دو ہفتے قبل 10 سے زائد بھیڑیں مار دی گئی تھیں۔
کینٹون والیس کے مطابق قومی شکار قانون کی حال ہی میں نرم کی گئی شرائط پر پورا اترنے کے بعد حفاظت یافتہ بھیڑیے کے شکار کی اجازت دی گئی ہے۔ اب اس کی اجازت ہے اگر بھیڑیے باڑ والے الگ تھلگ علاقے میں چرنے والے جانوروں کو یا پھر چٹانی اور ڈھلوان والے ایسے علاقوں جہاں باڑ لگانا ممکن نہیں، نقصان پہنچائیں۔
اس سے قبل بھیڑیوں کو صرف اس صورت میں مارا جا سکتا تھا جب بہت زیادہ جانور بہت کم وقت میں حملوں کا شکار ہوں۔ گزشتہ پندرہ برسوں میں کینٹون والیس کے محکمہ نے محض پانچ مواقع پر بھیڑیے کا شکار کیا ہے۔ پچھلے چند مہینوں سے سوئس کسان اور دیہی لوگ بار بار زور دے رہے ہیں کہ جانوروں کو نقصان پہنچانے والے بھیڑیوں کو پہلے اور زیادہ بار ختم کیا جائے۔
والیس میں صرف جولائی کے مہینے میں بھیڑیوں نے کم از کم 35 بھیڑیں مارنے کی اطلاعات ہیں۔ مقامی حکام نے اس لیے منگل کو کچھ بھیڑیے مارنے کی اجازت کا مطالبہ کیا ہے۔ برن، گراو بیونڈن اور ووڈ کے کینٹونز میں بھی مقامی افراد میں بھیڑیے کے خلاف مزاحمت بڑھ رہی ہے۔
ایک ہفتہ قبل کینٹون گراو بیونڈن نے اعلان کیا تھا کہ وہ کم از کم ایک بھیڑیے کو مارے گا کیونکہ مختلف البین چراگاہوں پر چراگاہی جانوروں پر متعدد حملے ہوئے ہیں۔ کینٹون ووڈ نے پیر کو وفاقی حکومت سے درخواست کی ہے کہ ووڈ جیورا کے علاقے میں بھیڑ بکریوں پر کئی تصدیق شدہ حملوں کے بعد دو جوان بھیڑیے مارنے کی اجازت دی جائے۔