ریاستہائے متحدہ امریکہ میں تقریباً 20 ملین ہیکٹر کھیت ممکنہ طور پر پی ایف اے ایس سے آلودہ نالے کے کیچڑ کی وجہ سے آلودہ ہو چکے ہیں جو کھاد کے طور پر استعمال کیا گیا تھا۔ یہ بات انوائرنمنٹل ورکنگ گروپ (EWG) کے ماحولیاتی محققین کی ایک نئی رپورٹ میں سامنے آئی ہے۔
درجنوں امریکی صنعتیں ہزاروں مصنوعات میں پی ایف اے ایس استعمال کرتی ہیں اور اپنا مائع صنعتی فضلہ اکثر سیوریج سسٹم میں خارج کرتی ہیں جس کے بعد بقیہ مواد نالے کے کیچڑ میں شامل ہو جاتا ہے۔
ان وائرنمنٹل ورکنگ گروپ (EWG) کے تجزیے نے نالے کے کیچڑ یا حیاتیاتی ٹھوس مواد کی وجہ سے کھیتوں کی آلودگی کا حجم واضح کیا ہے۔ اب تک امریکہ میں قانونی طور پر یہ طے نہیں کیا گیا کہ نالے کے کیچڑ کی پی ایف اے ایس کے لیے جانچ کی جائے۔ صحت کے حکام خبردار کر رہے ہیں کہ یہ عمل خوراک کی فراہمی کو خطرے میں ڈال سکتا ہے۔
پی ایف اے ایس تقریباً 9,000 کیمیائی مرکبات کا مجموعہ ہے جو مصنوعات کو گرمی، پانی یا داغ سے محفوظ بنانے کے لیے استعمال ہوتے ہیں۔ انہیں "ہمیشہ کیمیکلز" کہا جاتا ہے کیونکہ یہ قدرتی طور پر تحلیل نہیں ہوتے۔ یہ کیمیکلز کینسر، تھائیرائیڈ کے مسائل، جگر کی بیماریوں اور پیدائشی نقائص سے منسلک ہیں۔
EWG کے ڈائریکٹر اسکاٹ فیبر نے کہا، "ہمیں نالے کے کیچڑ میں پی ایف اے ایس کی آلودگی کا مکمل دائرہ معلوم نہیں کیونکہ امریکی ماحولیاتی ایجنسی EPA نے مقامی حکومتوں کے لیے اسے مانیٹر کرنا ترجیح نہیں بنایا۔"
کیچڑ فضلہ پانی کی صفائی کے عمل کا ایک ضمنی پیداوار ہے جو انسانی فضلہ اور صنعتی فضلے کا مرکب ہوتا ہے۔ کیچڑ ہٹانا مہنگا ہو سکتا ہے، لہٰذا فضلہ انتظامیہ کی صنعت اسے پودوں کے لیے غذائی اجزاء سے بھرپور کھاد کے طور پر بڑھاوا دے رہی ہے۔
EPA کے اعداد و شمار سے پتہ چلتا ہے کہ 2016 کے بعد سے اربوں کلو کیچڑ کھاد کے طور پر استعمال ہو چکا ہے۔ اندازہ ہے کہ امریکہ میں سالانہ 60 فیصد کیچڑ سیوریج پلانٹس سے کھیتوں یا دیگر زمینوں میں پھیلایا جاتا ہے۔
دو امریکی صوبوں میں جہاں فضلہ اور کیچڑ میں پی ایف اے ایس کی جانچ کی جاتی ہے، آلودگی کی وجہ سے کئی کھیتوں کو بند کر دیا گیا ہے۔ کیمیکلز فصلوں اور مویشیوں میں بھی پائے گئے ہیں، اور صحت کے اخراجات ابھی تک معلوم نہیں ہوئے ہیں۔